No nane better nor dunnerin bress
- Gin I speak wi the tungs o men an angels, but hae nae luve i my hairt, I am no nane better nor dunnerin bress or a ringing cymbal. Gin I hae the gift of prophesie, an am acquent wi the saicret mind o God, an ken aathing ither at man may ken, an gin I hae seccan faith as can flit the hills frae their larachs - gin I hae aa that, but hae nae luve i my hairt, I am nocht. Gin I skail aa my guids an graith in awmous, an gin I gie up my bodie tae be brunt in aiss - gin I een dae that, but hae nae luve i my hairt, I am nane the better o it.
Live is patientfu; luve is couthie an kind; luve is nane jailous; nane sprosie; nane bowdent wi pride; nane mislaired; nane hame-drauchtit; nane toustie. Luve keeps nae nickstick o the wrangs it drees; finds nae pleisur i the ill wark o ithers; is ey liftit up whan truith dings lies, kens ey tae keep a caum souch; is ey swiered tae misdout; ey howps the best; ey bides the warst.
Luve will ne'er fail. Prophesies, they s' een be by wi; tungs, they s' een devaul; knawledge, it s' een be by wi. Aa our knawledge is hauflin; aa our prophesiein is hauflin: but whan the perfyte is comed, the onperfyte will be by wi. In my bairn days, I hed the speech o a bairn, the mind o a bairn, the thocts o a bairn, but nou at I am grown manmuckle, I am throu wi aathing bairnlie. Nou we ar like luikin in a mirror an seein aathing athraw, but than we s' luik aathing braid i the face. Nou I ken aathing hauflinsweys, but than I will ken aathing as weill as God kens me.
In smaa: there is three things bides for ey: faith, howp, luve. But the grytest o the three is luve.
1 Corinthians 13. The New Testament in Scots translated by William Laughton Lorimer, published posthumously in 1983.